رولا: طول عمري بحب أيلول أكتر شهر بالسنة..
بس هون مرقوا عليي 90 يوم وكأنه كلون أيلول..
بكل لحظة فيون عم حس بصورة رح تبقى بذاكرتي كل العمر..
عيونهن وأنا وعم ودعون كانت عم تقول ضلّي..
وكنت حابّة ضل..
بس يمكن.. أو ما في يمكن! وما بتنفع ال يمكن!
لأنه ما في غير صلاة من القلب لحتى ينكتب لهالبلد تعيش بسلام..
بهاليومين انهريت من كتر العواطف..
مشوّشة وما عم بعرف آخد قرار!
إنت أكتر حدا من بين الكل ما بتسيرك عاطفتك..
لهيك.. خرج تكون جدّي وتساعدني؟
نورس: بشو بدي ساعدك؟
رولا: قرر إذا إبقى هون ولّا..
نورس: امشي وحتى لا تديري ضهرك ولا تفكري مجرد تفكير انو تحني..
رولا: وليش كل هاد؟
نورس: هي البلاد خرج تكون محطة..
دار ضيافة لكم يوم.. وكم أسبوع..
يجي الواحد يشوف بهيك أماكن كيف بينعاش على طول خايف من بكرا.. وخايف من كل شي..
بعدين يحمد ربه انو مو قدره يعيش هون..
ويحمل حالو ويرجع على البلاد اللي بتحترم البني آدم لأنو بني آدم .. مو لأنو ابن فلان أو محسوب على فلان..
روحي ولا تديري ضهرك ليجي يوم وتصير شي معجزة.. وتصير هي البلاد بتستاهل تتسمى وطن!
-