باليابان في فن قديم اسمو "#الكينتسوجي". وهالفن بيعلمنا درس عميق بالحياة. لما شي ينكسر، ما بيرموه ولا بيعتبروه انتهى، بالعكس، بيصلحوه بطريقة بتخليه أحلى من الأول. بيلزقوا القطع المكسورة بمادة خاصة وبيزينوا الشروخ بالذهب، وبيتحول الشي المكسور لتحفة فنية إلها قيمة أكبر من قبل. الفكرة مو بس عن الأواني، هي عن الناس... عنّا نحنا! كل واحد منا مرق بظروف صعبة وواجه انكسارات بحياتو، بس المهم كيف منتعامل معها. بدل ما نهرب من هالجروح ونخبّيها، لازم نحتضنها ونحوّلها لشي قوي وجميل. وهون الفكرة بتوصل لبلدنا. بلدنا كمان مرقت بكتير انكسارات وصعوبات، بس هي ما بتتعافى لحالها. هي بحاجتنا نحنا نكون متل "الكينتسوجي" تبعها، نصلّح ونبني ونزرع الأمل من جديد. كل جرح هو فرصة لنخلق شي أجمل وأقوى، وكل واحد منا هو جزء من هالتجربة. بلدنا ما بتحتاج ناس بيشوفوا الكسور وبيستغنوا عنها، بتحتاج ناس بيشوفوا الجمال خلف هالكسور، وبيشتغلوا بإيد وحدة ليرجعوا يلمّوا القطع المبعثرة ويحولوها لتحفة من ذهب. "يلي انكسر بيتصلّح... وبيصير أجمل!" #سورية #السويداء